02 fevral 2016-cı il tarixdə Azərbaycan Respublikası Prezidentinin ictimai-siyasi məsələlər üzrə köməkçisi Əli Həsənov Quba rayon ictimaiyyəti ilə görüş keçirmişdir.
02 fevral 2016-cı il tarixdə saat 11:00-da Quba rayon mədəniyyət evində Azərbaycan Respublikası Prezidentinin ictimai-siyasi məsələlər üzrə köməkçisi, Prezident Administrasiyasının İctimai-siyasi məsələlər şöbəsinin müdiri Əli Həsənov rayon ictimaiyyəti ilə görüş keçirmişdir. Tədbirdə Azərbaycan Respublikası Prezidenti Administrasiyasının Regional idarəetmə və yerli özünüidarəetmə orqanları ilə iş şöbəsinin baş məsləhətçisi Arif Novruzov, millət vəkilləri Vahid Əhmədov, Yevda Abramov, rayon rəhbərliyi və ictimaiyyəti iştirak etmişdir.
Görüş iştirakçıları ümummilli lider Heydər Əleyevin abidəsini ziyarət edərək heykəlin önünə gül-çiəçək dəstələri qoymuşlar. Rayon mədəniyyət evində davam edən tədbiri rayon icra hakimiyyətinin başçısı Yaşar Məmmədov açaraq son illər Qubada görülən işlər, regionların sosial-iqtisadi inkişafına dair Dövlət proqramlarının icrası istiqamətində həyata keçirilən tədbirlər və nəzərdə tutulan layihələr barədə məlumat verib. Görüşdə çıxış edən Azərbaycan Respublikası Prezidentinin İctimai-siyasi məsələlər üzrə köməkçisi, İctimai-siyasi məsələlər şöbəsinin müdiri Əli Həsənov bildirib ki, ictimaiyyət nümayəndələri ilə keçirilən bu görüş “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının ikinci ilinin yekunlarına həsr olunmuş konfransda Prezident İlham Əliyevin çıxışından irəli gələn məsələlər, verilən tapşırıqlar, 2016-cı ildə görüləcək işlər, nəzərdə tutulan tədbirlər barədə rayon ictimaiyyətini daha yaxından məlumatlandırmaq məqsədi daşıyır.
Tədbirdə Qubanın sosial iqtisadi inkişafı ilə bağlı preoritet məsələlərdə müzakirə olunub. Qubada meyvə emalı müəssisələrinin yaradılması, eləcə də son illərdə fəaliyyəti məhdudlaşan konserv zavodunun fəaliyyətinin yenidən bərpasının vacibliyinə toxunan Əli Həsənov yerli icra strukturlarının rəhbərlərinə yeni iş yerlərinin yaradılması, sahibkarlığın inkişaf etdirilməsi, əhalini narahat edən məsələlərin aradan qaldırılması ilə bağlı müvafiq tapşırıqlar verib.
Tədbirdə Milli Məclisin deputatları Vahid Əhmədov, Yevda Abramov çıxış edərək, Qubanını sosial-iqtisadi inkişafı ilə bağlı bir sıra təkliflər səsləndiriblər. Görüş iştirakçıları dövlətimizin başçısının antiböhran tədbirlərini dəstəklədiklərini bildirib, ölkəmizdə qeyri-neft sektorunun inkişafı üçün atılan addımları yüksək dəyərləndirdiklərini diqqətə çatdırıblar. Çıxışlarda rayon əhalisi ilə dövlət nümayəndələrinin birgə fikir mübadiləsi aparmasının əhəmiyyəti xüsusi qeyd edilib.
Görüşdə Qubanın inkişafı ilə bağlı müraciət və təkliflər qeydiyyata alınaraq, onların həllinə kömək göstəriləcəyi bildirilib.
